Министрлер Кабинетинин Төрагасы Адылбек Касымалиев Балыкчы шаарындагы “Алтын Логистик” эл аралык логистикалык борборунун ачылыш аземине катышты

Ысык-Көл облусу, Балыкчы, 28-май – Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Адылбек Касымалиев Балыкчы шаарындагы “Кыргызалтын” ААКтын “Алтын Логистик” эл аралык логистикалык борборунун ачылыш аземине катышты.

МинКаб Төрагасы белгилегендей, эл аралык транспорт коридорлорунун кесилишинде жайгашкан Кыргызстан өзүнүн транзиттик жана логистикалык потенциалын активдүү өнүктүрүүдө.

"Бул жааттагы маанилүү долбоорлордун бири - "Алтын Логистик" эл аралык логистикалык борбору. Борбор Улуу Жибек жолунун маанилүү багыттарынын биринде жайгашкан жана ал Кытайды, Борбор Азия өлкөлөрүн жана КМШ өлкөлөрүн байланыштырган негизги логистикалык хаб катары натыйжалуу иш алып барарына ишенем. Бул ыңгайлуу жайгашкан жер эл аралык соода байланыштарын кеңейтүүгө, транзиттик жүк агымын көбөйтүүгө жана региондун транспорттук-логистикалык секторунда Кыргыз Республикасынын ролун бекемдөөгө кеңири мүмкүнчүлүктөрдү түзөт”, - деди ал.

Долбоор аймактын социалдык-экономикалык өнүгүүсүнө да салым кошуп жатканын Адылбек Касымалиев улантты. Мында 80ден ашык жаңы жумуш орундары түзүлдү.

Министрлер Кабинетинин Төрагасы өз сөзүндө “Кыргызалтын” ААКнын ишмердүүлүгүнө өзгөчө токтолду. Уюм тоо-кен тармагы менен эле чектелбестен, логистика, инфраструктура жана инвестиция жаатындагы долбоорлорду ийгиликтүү ишке ашырып келет. Ал компаниянын 2025-жылдагы оң каржылык көрсөткүчтөрү эффективдүү башкаруунун жана кесипкөй башкаруунун натыйжасы экенин билдирди. Тактап айтканда, 2025-жылдын аягына карата “Кыргызалтын” ААКсы мамлекеттик бюджеттин киреше бөлүгүн 18,7 млрд сомдон ашык түздү.

Логистикалык борбор 5,5 гектар аянтка жайгашып, транспорттук-логистикалык процесстерди коопсуз жана натыйжалуу уюштуруу үчүн заманбап инфраструктура менен жабдылган. Комплекстин кубаттуулугу күнүнө 200 жүк ташуучу унааны тейлөөгө мүмкүндүк берет.