«Кыргызалтын» ААК менен И. Раззаков атындагы КМТУ тоо-кен тармагы үчүн дуалдык билим берүүнү киргизүү боюнча келишимге кол коюшту

 

Аталган документ өлкөнүн тоо-кен тармагын квалификациялуу ата мекендик кадрлар менен камсыз кылууга багытталган.

Алдыдагы жылдары «Кыргызалтын» ААК бир катар ири кен долбоорлорун ишке киргизүүнү пландап жатат.

Бул өз кезегинде инженердик-техникалык адистерге болгон талаптын олуттуу өсүшүнө алып келет. Алдын ала эсептөөлөр боюнча, жакынкы эки жыл ичинде компанияга тармак боюнча 100дөн ашык квалификациялуу кызматкер талап кылынат.

 

2026-жылдын сентябрь айынан тартып И. Раззаков атындагы КМТУнун студенттери окуу менен катар «Кыргызалтын» ААКнын өндүрүштүк объектилеринде практикалык тажрыйбадан өтүү мүмкүнчүлүгүнө ээ болушат. Мындай ыкма келечектеги адистерге өндүрүштүк көндүмдөрдү алууга, ал эми ишканаларга өздөрүнө керектүү кадрларды алдын ала даярдоого шарт түзөт.

 

«Дуалдык билим берүү системасы университет менен өндүрүштүн мүмкүнчүлүктөрүн бириктирип, студенттерге практикалык көндүмдөрдү алууга жана тармакты кесипкөй ата мекендик кадрлар менен камсыз кылууга мүмкүндүк берет. Бул келишим Кыргыз Республикасынын тоо-кен тармагын өнүктүрүүгө маанилүү салым кошот деп ишенем», - деп белгиледи «Кыргызалтын» ААКнын Башкармалыгынын төрагасы Кубат Абдраимов.

Ошондой эле жолугушуунун жүрүшүндө «Кыргызалтын» ААКнын Башкармалыгынын төрагасы Кубат Абдраимов Кыргыз Республикасынын Илим, жогорку билим берүү жана инновациялар министри Гүлзат Исаматова менен тоо-кен тармагы үчүн квалификациялуу кадрларды даярдоо маселелерин талкуулады.

 

Тараптар студенттердин өндүрүштүк практикасын өнүктүрүүгө, билим берүү мекемелери менен тармактагы ишканалардын өз ара кызматташуусун күчөтүүгө, ошондой эле адистештирилген окуу жайлардын материалдык-техникалык базасын жакшыртууга өзгөчө көңүл бурушту.

Белгилей кетсек, буга чейин «Кыргызалтын» ААК кадрларды даярдоо маселесин талкуулоо демилгесин көтөрүп, Кыргыз Республикасынын Министрлер Кабинетинин өкүлдөрүнүн, жогорку окуу жайлардын жана тоо-кен компанияларынын катышуусунда тармактык форум өткөргөн.

Форумдун жыйынтыгында дуалдык билим берүүнү өнүктүрүү өндүрүш менен жогорку билим берүү системасынын ортосундагы кызматташуунун артыкчылыктуу багыттарынын бири катары белгиленген.