«Кыргызалтын» ААК менен «AzerGold» ЖАК кызматташтыктын келечегин талкуулашты
«Кыргызалтын» ААКнын Башкармалыгынын төрагасы Кубат Абдраимов Кыргыз Республикасына жумушчу сапардын алкагында Азербайжан компаниясынын делегациясын жетектеп келген «AzerGold» ЖАКнын Башкармалыгынын төрагасы Закир Ибрагимов менен жолугушуу өткөрдү.
Жолугушуунун жүрүшүндө тараптар 2026-жылдын 31-июлунда Чолпон-Ата шаарында Азербайжан Республикасы менен Кыргыз Республикасынын Мамлекеттер аралык кеңешинин үчүнчү жыйынынын алкагында, эки мамлекеттин башчыларынын катышуусунда кол коюлган «Кыргызалтын» ААК менен «AzerGold» ЖАКнын ортосундагы кызматташтык жана өз ара аракеттенүү жөнүндө меморандумдан келип чыккан маселелерди талкуулашты.
Негизги көңүл тоо-кен тармагында өз ара пайдалуу кызматташтыкты өнүктүрүүнүн келечегине, биргелешкен долбоорлорду ишке ашырууга, инвестиция тартууга, ошондой эле пайдалуу кендерди геологиялык чалгындоо, казып алуу жана кайра иштетүү жаатында тажрыйба алмашууга бурулду.
«Кыргызалтын» ААКнын Башкармалыгынын төрагасы Кубат Абдраимов акыркы беш жылда Кыргызстандын тоо-кен тармагы өлкөнүн экономикасынын алдыңкы секторлорунун бирине айланганын белгиледи.
Анын айтымында, 2020-жылдан тартып тармакта натыйжалуулукту жогорулатууга, инвестицияларды тартууга жана эл аралык кызматташтыкты өнүктүрүүгө багытталган масштабдуу реформалар ишке ашырылууда.
Кубат Абдраимов азербайжан тарапка «Кыргызалтын» ААКда жүргүзүлүп жаткан өзгөртүүлөр, мамлекеттик компаниянын түзүмүн өркүндөтүү, туунду ишканалардын мүмкүнчүлүктөрүн кеңейтүү, ошондой эле учурдагы долбоорлордун портфели жана ишмердүүлүктүн жаңы багыттары тууралуу маалымат берди.
«Кыргызалтын» ААКнын Башкармалыгынын төрагасы компания эл аралык өнөктөштүктү кеңейтүүгө жана жаңы инвестициялык долбоорлорду ишке ашырууга кызыкдар экенин баса белгиледи.
Өзгөчө көңүл «AzerGold» ЖАК менен кызматташууга бурулду. Кубат Абдраимов азербайжан тараптын кызматташтыкты өнүктүрүү жана өз ара колдоо көрсөтүү боюнча сунушу «Кыргызалтын» ААК тарабынан оң кабыл алынганын белгиледи.
Анын айтымында, өткөрүлгөн сүйлөшүүлөр кызматташтыктын жаңы багыттарын ачууга, ошондой эле Кыргызстандын тоо-кен тармагындагы келечектүү долбоорлорду биргелешип кароого мүмкүнчүлүк түзөт.
Өз кезегинде «AzerGold» ЖАКнын Башкармалыгынын төрагасы Закир Ибрагимов мамлекет башчыларынын лидерлиги жана саясий эркинин негизинде Азербайжан менен Кыргызстандын ортосунда достук жана боордоштук мамилелер түзүлүп, бул экономикалык байланыштарды, анын ичинде тоо-кен өнөр жайындагы өнөктөштүктү кеңейтүүгө жагымдуу шарттарды түзүп жатканын белгиледи.
Закир Ибрагимов «AzerGold» ЖАКнын геологиялык чалгындоо, кен чыккан жерлерди баалоо, казып алуу жана кайра иштетүү багыттарындагы тажрыйбасы тууралуу маалымат берди. Ошондой эле азербайжан тарап оккупациядан бошотулган Карабах жана Чыгыш Зангезур экономикалык райондорунда жүргүзүлүп жаткан геологиялык чалгындоо иштери жана аэромагниттик, ошондой эле башка инвазивдүү эмес заманбап чалгындоо ыкмаларын колдонуу тууралуу маалымат берди.
Белгиленгендей, «AzerGold» ЖАК Азербайжандан тышкары өз ишмердүүлүгүн кеңейтүүнү стратегиялык артыкчылыктарынын бири катары карайт жана Борбордук Азияда биргелешкен тоо-кен жана геологиялык чалгындоо долбоорлорун ишке ашыруу мүмкүнчүлүктөрүн изилдөөдө.
Жолугушуунун жыйынтыгында «Кыргызалтын» ААК менен «AzerGold» ЖАК өз ара кызыкчылык жараткан багыттар боюнча кызматташтыкты улантууга жана конкреттүү биргелешкен долбоорлорду ишке ашыруу аркылуу кызматташтыкты кеңейтүү мүмкүнчүлүктөрүн биргелешип иштеп чыгууга макулдашышты.
